നിറധാതു ഗര്‍ഭത്തിന്‍ മേലേ
മാറില്‍ തിണര്‍പ്പുകളുമായീ
കൂരകള്‍ പനിക്കുന്നത്
ഒരു നുള്ളു ഗന്ധകത്തിന്‍ വിശപ്പിലോ
ഒരു ചെറുകനലില്‍ ചുംബനത്തിലോ
അടിയറവു പറഞ്ഞില്ലാതാവാന്‍
ബലഹീനമാമീ വിരലുകള്‍ക്കിടയില്‍
തളര്‍ന്നിരിക്കുന്നുണ്ട് ഒരു പെരുവിരല്‍
വേര്‍പാടിന്‍ വിറയലില്‍ വഴികള്‍ മറന്ന്
കരിമഷി തലോടാത്തോരീ കണ്ണുകളില്‍
വിരുന്നെത്തും മുന്‍പേ
കൈമോശം പോയൊരു
പെണ്മതന്‍ കൊടിയിറക്കം
അരയില്‍ ചുമടായി വിലാസം തെറ്റിയോരതിഥി
നിറയാവയറില്‍ ദഹിക്കത്തൊരു ഭാരം
മഞ്ഞോഴിയും പോലെ
കുന്നുകളിലെ പച്ചപ്പുമായും.
പുഴകള്‍ ,
മയങ്ങുന്ന ഞരമ്പുകള്‍ പോലെ
ചെറുചലനം ബാക്കിയില്ലാതെ
പുകഞ്ഞു തീരും
പടക്കോപ്പുകളില്‍ പുതുപേരുകള്‍;
ആംഗലേയ ലിപികളില്‍
ഓപ്പറേഷന്‍ ഗ്രീന്‍ ഹന്ടെന്നു കൊത്താം
ചോരയെ ചോരയാല്‍
ചുവരിലെ മെഴുക്കുപോലെ
തുടച്ചു മാറ്റാന്‍ സല്‍വ ജൂഡങ്ങള്‍
പുത്തന്‍ ഭസ്മാസുരജന്മങ്ങള്‍ക്കിനി
വെള്ളരിപ്രാവുകളുടെ മാര്‍ച്ച്‌ പാസ്റ്
ഒളിപ്പോരുകള്‍ക്കൊടുക്കം
കുടിലുകളുടെ അസ്ഥികള്‍ക്കുമേല്‍
കുടിയേറ്റത്തിന്‍ സൈറന്‍ മുഴുങ്ങും
ദല്ലാള ശിബിരങ്ങളില്‍ പച്ചമാംസത്തിന്റെ
പങ്കുവെക്കലുകള്‍ക്കവസാനം
പടം പൊഴിച്ചൊരു ചേരയുടെ
ദീര്‍ഘ നിശ്വാസത്തെയോ,
നിറംമാറിയൊരോന്തിന്റെ
സ്ഖലനാനുഭവങ്ങളെയോ
ഉപമിച്ചു വശംകെടും
